juli 12, 2020
fan ûnbekend*
fan ûnbekend**
Wol tûzen dea yn ien kertier,
deunby de Gouden Timpel
fan Amritsar, ’t koe net minder,
dat it skreaude withoefier.
It fjoer kaam út in Britsk gewear,
geweld as bluodrich stimpel
op Britsk-Ynje… harkje, blinder,
kom net by de timpel gear.
It folk gie foar it eigen lân
nei ’t park tichtby de timpel
om ’t Baisakhi-feest te fieren,
wat massaal rûn út ’e hân.
Der wie doe gjin ûntkommen oan,
de Brit fûn it mar simpel
om de boaiem read te sieren,
hy siet hearskjend op ’e troan.
Mar sûnder of mei tsjingeweld
set ek it folk syn stimpel
op it eigen lân, mei minder
kin it net, de frijheid telt.
* Yllustraasje ‘Moardpartij yn Amritsar’
** Monumint ‘Jallianwale Bagh’
juli 5, 2020
fan ûnbekend*
fan ûnbekend**
As bern kriich hy in namme
dy’t op revolúsje wiist:
Benito, nei in revolúsjonêr
yn Meksiko… tsjin keizers macht,
de striid hat dêr heech flamme.
Syn heit sloech mei de moker
op it ambyld, sosjalist
mei hiel syn hert, foar soan Benito stjer
om nei te folgjen: oan de macht
it folk, dat stie foar joker.
Hy hie earst gjin fidúsje
yn geweld en tsjerklik spul,
woe ek net wurde moardzjend militêr,
mar letter rôp er wol: ‘Jou acht!’
Hy gie foar revolúsje.
Syn each loek nei de naasje,
wat op eigen grinzen wiist,
de eigen minsken hjir, de oaren dêr,
’t ferskil kaam del op dei en nacht,
’t fassisme krige faasje.
* Foto ‘Mussolini as jonge’
** Foto ‘Mussolini as lieder’
