mei 3, 2026
fan ûnbekend*
Lit gjin atoombom yn it lân
ûntploffe dêr’t men wennet,
ek al is it mar in test,
far oer de Stille Oseaan
nei Enewetak, in atol
fan neat, dêr kin it.
Lit alle minsken fan ’t atol
ferfarre, want sa kin it
foar dit folk út goederbêst,
gjinien is troch de bom der west
en elkenien is strielingsfrij…
fernimme bern it?
Wolnee, dy boartsje troch
en litte har net kenne,
komme letter wol werom
op wat sa al net barre kin
op Enewetak, har atol,
it sil nea wenne.
* Foto ‘Wetterstofbom op Enewetak’
april 18, 2026
fan Ossip Zadkine*
De hannen heech,
de polzen brutsen,
de holle skean
foar noch ien tút,
de skonken bryk,
it hert derút.
Hat Rotterdam
de oandacht lutsen
fan Israel?
Dan wie ’t beslút
net nommen, no
is ’t hert derút.
It hert fan troch
de iuwen hinne,
it kloppe troch,
mar no is ’t út:
Jahweh ropt net,
’t hert is derút.
Wa’t herten brekt,
sil ’t pleit net winne,
sjoch hoe’t de mem
jout noch ien tút
oan ’t deade bern,
sy gûlt it út.
* Ossip Zadkine (1888-1967)
Byld ‘De ferwoaste stêd’