november 18, 2023
fan ûnbekend*
Hy seach syn earste ljocht
yn Addis Abeba
en heinde ’t ljocht fan Wommels
op, garant foar it bestean,
dat winske men him ta.
Syn winsk bestiet út hoop
op elk in goed bestean
om ta syn rjocht te kommen,
hoop dy’t oergiet yn de died,
wrâldwiid om foar te gean.
Hy draacht syn ideaal
de wrâld yn: nim de lêst
fan rêgen dy’t net drage
kinne, sterke skouders wol,
sa stiet de takomst fêst.
Fan Addis Abeba
oant Wommels en De Haach
slacht Habtamu de brêge
nei de minsken fan ferlet
fan ’t antwurd op har fraach.
* Foto ‘Habtamu de Hoop’
november 5, 2023
fan ûnbekend*
It spoarde yn Koréa net,
in situaasje bûten rails
fanwege fûle strideraasje
tusken noard en súd…
wat wie de goede naasje?
De boargers waarden bûten set
en flechten treurjend tusken rails
dy’t streekrjocht nei it suden laten,
tusken eangst en hoop…
gjin sin om noch te praten.
Koréa liedt nei Israel,
twa spoaren fan ekstreem geweld
fanwege lange strideraasje
oer besit fan lân…
wat is de goede naasje?
De boargers binne net yn tel
en wurde nei it suden dreaun,
as slachtfee deade troch de bommen
fan de naasje mei
’t gefoel: oan ’t lot ûntkommen.
Dy naasje deadet bern nei bern,
de takomst fan in folk yn need,
ûntnommen lân yn it ferline,
lykas Israel,
de macht dy ’t slacht mei pine.
* Foto ‘Flechtlingen’