september 21, 2018
fan John William Waterhouse*
Bekend wie sy mei ’t labyrint
op Kreta, dêr’t heit Minos hearske,
ek it plak fan Minotaurus…
Ariadne joech de hint.
Koe ien it meunster wol ferslaan,
dat hie it stal fan bolleminske?
Elk wie bang foar Minotaurus…
Ariadne soe it jaan.
Theseus foer as keningssoan
nei Kreta, woe mei ’t meunster stride,
foar ’t gefjocht mei Minotaurus
seach er Ariadne oan.
Sy joech de prins in lange trie
foar ’t labyrint, wie ek fereale,
doe fersloech er Minotaurus,
fûn de útwei nei syn die.
Tegearre giene sy op reis
en kamen oan op ’t eilân Naxos;
wylst de leave faam dêr sliepte,
wie de feint wer ûnderweis.
Dionysos fûn har op it strân
en waard as dronkenman fereale;
as de wyngod woe hy ’t fiere,
fierde har nei’t goadelân.
* John William Waterhouse (1849-1917)
Skilderij ‘Ariadne’
september 14, 2018
fan Jean-Francois Detroy*
De opdracht wie foar fyftich helden,
farrend op de ‘Argo’ withoefier,
gjin langstme mear nei ’t folkje thús:
‘Manmachtich binne jim as Argonauten,
helje op it gouden flues!’
De aventoeren dy’t se telden,
wiene net te hâlden op ien hân:
mei froulju, fjochters en frjemd folk,
manmachtich wiene sy as Argonauten,
sjoen troch goaden op har wolk.
De trochgong tusken blauwe rotsen
waard earst hifke mei in rappe do,
doe foer de ‘Argo’ like rap
dertroch, manmachtich hearden Argonauten
achter har de stiennen klap.
Koe lokjend roppen ’t skip dan botse
litte? Orpheus song der dwers tsjinyn,
fersloech sa hiel ’t Sirenefolk,
manmachtich bleauwen sy as Argonauten,
sjoen troch goaden op har wolk.
De opdracht foar de fyftich helden
waard foltôge mei it gouden flues
en langstme nei it folkje thús.
* Jean-Francois Detroy (1679-1752)
Skilderij ‘De fangst fan it gouden flues’