Archive for the Lyrysk Deiboek category

Depresjes jeie wolken oan,
wat is de sin fan it bestean
as maatskippijen net mear winne?
Suïside krijt de boppetoan,
fertsjinne is it lêste lean.

Mar sjoch wat oan it eilân leit
lykas yn dagen fan alear
al fier foardat der boaten binne
dy’t fûl stride as it stoarmich waait:
it is de loadsboat fan de Hear.

It Snitser swart-giel yn de mêst
fertelt fan ’t sinljocht yn de nacht
as munten dy’t oer ’t wetter rinne;
’t jout de djippe krisis heech hâldfêst…
‘k rûn troch en hearde slach noch klacht.

It giet om ’t heechste, dêr’t de fleugel
sjen lit hoe’t de wyn de septer swaait,
de foarst te ryk,
en as it út ‘e hichte waait,
dan hearskje skippers yn har keninkryk.

It roer is dan de troan,
de boat giet oan.

It giet om lang en breed, de lading
moat mei tonnen yn it romme rom:
wat bringt it op?
Wa’t net losse kin, is stom
en mist tenei de fleugel yn de top.

Fuort waait de skipperskroan,
de boat is oan.

Wat heech en lang en breed? De flaggen
klappe ’t ritme fan it oare liet,
de prins te ryk,
en as it om de wille giet,
dan sit en stjoert de skipper wolris bryk.

It roer is foar de soan,
de boat giet oan.