maart 6, 2023
De Frije Noarder Ploech
hat frijheid yn it findel
foar himsels en elkenien,
foar minsken en foar dieren,
wa’t sa praat, wurdt wol ferstien.
It praat giet oer de wolf,
mar Frije Noarder Praters
sprekke ek de wolven oan
en freegje wat sy fine
fan diskusjes op ’e toan…
… fan sjit dy bisten ôf,
foar moard stiet eksekúsje
op it allerearste plak,
it lêste binne stekken…
jou de wolf nea syn gerak!
De Frije Noarder Ploech
mei frijheid yn it findel
foar de minsken en elk dier
heart alle wolven gûlen:
eksekúsje giet te fier!
Dus prate Ploech en wolf
ôf dat de skiep yn hûd fan
fijân wolf ek bite yn
de strôte fan de wolven…
wat is werklikheid, wat skyn?
februari 27, 2023
Hoewol’t de namme treurich klinkt
en sy de tûken hingje litte,
kin men yn de maitiid sjen
dat ljocht en skaad har eigen binne
en de hoop op waarmte winkt.
Wat nei in jier al barre kin,
dat koe gjin minske foarút witte,
’t is te treurich om te sjen
dat ljocht en skaad der net mear komme:
tiid hat hjir in min ferrin.
Op deaslach komt it stielhurd del,
om’t hjir en dêr al bledsjes sitte,
is it net om oan te sjen,
it skaad skoot oer it ljochte hinne…
wat is dan noch wol yn tel?
