Archive for the Lyrysk Deiboek category

Se meitsje harren meters lang
as Lipton Ice Tea op ‘e dyk,
dy’t troch de droege kielen glydt,
ferbylding fan de earste rang
dat wike moat wa’t net omlyk
wol yn de silersstriid.

Sy farre troch, by ’t striidfjild lâns,
mei langte foar it deistich brea
en foarrang op ‘e silerij,
in rom fol fracht is harren kâns,
in lege dei jout inkeld skea
en Lipton rydt foarby.

As polders reitsje sompich fol,
dan bromme boeren yn it koar it liet:
‘Lit gau foar ús belang ’t gemaal
mar draaie, nei it wurd de died,
want boeren sprekke kleare taal.’

It wetter streamt de boezem yn,
wat is de skûtsjeskipper wol nei ’t sin,
want djipper giet har silersliet:
‘Wy stekke ’t swurd en heine wyn,
dy boeren binne net sa min.’