juli 13, 2020
De waaier stekt der boppe-út
om út te finen wat de wyn krekt wol,
de rjochting, ek hoe hurd it waait,
mar net wat bart op ’t politike mêd:
diskusje earst, dan it beslút.
Wannear’t gehiel wyt ynpakt wurdt,
dan kriget men in posityf berjocht:
jou jim mar del, de wyn is draaid,
’t kolleezje wol it bêste foar de stêd,
wat west hat, hie in lange sturt.
De waaier wiist súdwester stoarm,|
dy’t skuort en raamt oan ’t kamûflaazjekleed,
sadat wat grau is, iepemleit,
’t kolleezje, dat it net allinnich rêdt,
is transparant en slacht alarm.
juli 6, 2020
Wannear’t gjin tûke draacht in blêd,
de dei úteinset mei in grauwe loft,
de wyn krûpt by de fearren yn,
dan hâldt de moarntiid efkes skoft
foar wa’t noch dreamt op bêd.
Wa wit de dreamen fan in swan,
dy’t him by ’t earste deiljocht driuwe lit
en oerjout oan de sterke wyn,
dy’t winters fan gjin wiken wit,
dêr wit de swan ek fan.
De wyn stekt him syn dreamen yn
fan simmerdeis by himelsblauwe loft
al ier de brede wjukken út
en fleane om dêrnei in skoft
gjin kop te sjen… ‘t is skyn.
