juni 30, 2022
fan Carl Friedrich Baudry*
Ferkundigje it opstean
fan Kristus yn de katedraal,
de iuwen troch in klear ikoan
foar ’t folk dat syn wei folget
fan it libben nei de dea,
hjoed jildt foar elke Rus:
lang libje Kristus… ús ferhaal!
Ferkundigje it opstean
fan Poetin yn de katedraal
fan ’t Kremlin, hy is Kristus’ soan,
dy’t eigen wegen folget
fan it libben nei de dea,
hjoed jildt foar elke Rus:
lang libje Poetin… ús ferhaal!
Ferkundigje de delgong
fan Ruslân yn it kriichsgeweld,
dat gatten sjit yn it ikoan
fan ’t folk fan Oekraïne,
dat de dea fielt oan de lea,
it wint it fan de Rus,
omdat it opstiet… dat fertelt.
* Carl Friedrich Baudry (1812-1894)
Skilderij ‘Prosesje by de Ferkundigingskatedraal
yn it Kremlin fan Moskou’
juni 23, 2022
fan Jan Mankes*
Ik ha in selfy makke
mei de ûle op ’e hân,
dy’t wol wat fan my hat,
wy binne beide hjir ússels,
ik bin dy en do bist my…
ha wy ússels te pakken?
Do giest fansels nei tsjerke,
mar net foar in drege preek,
wol omdatst jongen hast;
ik bliuw yn tsjerke by mysels,
mei dyn flecht fiel ik my frij,
al driuwend op ’e flerken.
Gjinien krijt ús te pakken,
want wy ha it dreechste hân:
net nei ússels te sjen,
mar heech by oaren op te sjen,
ik sjoch dy en do sjochst my,
sa hawwe wy it makke.
* Jan Mankes (1889-1920)
Skilderij ‘Selsportret mei ûle’