mei 19, 2022
fan Albrecht Dürer*
Se rûnen by de hichte op
om út te sjen nei ’t kommen
fan Kristus foar de twadde kear,
sa’t Hy foarfêst ûnthjitten hie,
mar ’t útsicht wie net klear.
Ynienen kamen machten op,
manmachtich yn de lichte,
de biskop mei de heechste hear,
sy wiene daliks út ’e rie:
de klim nimt no in kear.
Befel waard doe befel, de rop:
‘Smyt ketters fan de hichte,
brûk dêrnei hammer, swurd en spear,
slaan oan it krús, kom ta de die,
oan Kristus is de ear!’
Se seagen Kristus oer de kop
en lieten Him omkomme
oan ’t krús troch hammer, swurd en spear,
sadat Hy net te sprekken wie…
oer har domdryste lear.
* Albrecht Dürer (1471-1528)
Skilderij ‘Martelgong fan tsientûzen kristenen’
mei 12, 2022
fan Peter Paul Rubens*
Har skientme koe wol sprekken lije,
spriek de kening oan fan Ingelân,
dy’t har ornearre foar syn soan,
hy skonk har withoefolle fammen…
gie sy wol in heidensk houlik oan?
Sy foer mei withoefolle skippen
mei har fammen fan stêd Keulen nei
de paus; in ingel spriek har oan:
‘Do komst werom yn Keulen, krigest
fan it himelfolk de martlerskroan.
De wrede Hunnen kamen earder,
sleaten Keulen en de fammen yn,
begiene in massale moard,
sa waard ek Ursula fermoarde…
mei de martlerskroan kaam sy oan board.
* Peter Paul Rubens (1577-1640)
Skilderij ‘Hillige Ursula wurdt martele’