Archive for the Keunst category

Sy wie de lêste dagen stil,
de stilte fan in bleek gesicht,
fan hannen foar it bidden gear,
fan sitte sûnder eigen wil,
de eagen foelen gauris ticht.

Hy koe net oer har eachopslach
en net oer ’t stoarjen nei it rút,
har pine die himsels ek sear,
hy stie har by, op ’t suchtsjen wach,
mar kriich as tank net iens in tút.

De dokter moast de trochslach jaan
nei ’t skôgjen fan it giele miel,
hy wie nei ien minút al klear:
‘Jo wolle ’t mei jo man net dwaan,
mar hawwe oan in oare diel.’

* Samuel van Hoogstraten (1627-1678)
Skilderij ‘De besite fan in dokter’

It oansjen fan in pauwesturt
is ’t wûnder fan in hûndert stjerren
yn in bôge, wol by ljochtskyndei,
betsjoening wurdt it bern yn wei,
it wjukket op dy fearren.

It famke sjocht it hingjen oan
fan kop en sturt, de brede fearren
fan de wjukken binne noch te sjen,
de kleuren ha de glâns ferlern…
bern ha gjin weet fan stjerren.

* Rembrandt (1606-1669)
Skilderij ‘Stillibben mei deade pauwen’