Stoffen wjukken slute ôf
wat yn in frjemde kromte leit,
by neier ynsjen is ’t in frou
dy’t ljochtskyndei neat seit.

As wie ’t nacht, sa sakket sy
de djipte yn, fertize yn
in faai bestean al lang foarby,
it oare is mar skyn.

Lykwols achter har skynt ljocht,
twa wjukken binne iepenslein,
sy hat de eagen ticht en sjocht
it fleanen yn de rein.

’t Liket har op fleanen ta,
de kromte seit, sy is te swier
foar stoffen dy’t gjin wjukken ha,
sy sakket op ‘e flier.

* James Ensor (1860-1949)
Skilderij ‘De dame yn need’