Archive for the Keunst category

Se wenne op ‘e Hearegrêft,
dus moast se eptich rinne
yn in wite jurk, mei ljochte hoed,
net roppe, yn it praten sêft,
gjin hân omheech by glimkegroet,
want sa soe elk de âlders kenne.

Mar doe’t se rekke út it sicht
fan heit en mem die ’t rinnen
nei de rjochte regels har gjin sier,
se swalke mei de eagen ticht
en dan wer iepen foar ’t plezier,
knypeage laitsjend nei de sinne.

Se koe har mem dy deis net mear,
mei ’t suske yn de dunen
mocht se sûnder hoed sa yn it sân
en kopketûmelje, sân kear,
en roppend drave oer it strân
en by de kninehoalen strune.

* Harry Kuyten (1883-1952)
Skilderij ‘Hearegrêft Amsterdam’

** Jan Akkeringa (1864-1942)
Skilderij ‘Mem mei bern yn de dunen’

De see dûkt út it tsjuster op
as ’t earste ljocht strykt oer de kym
en út ‘e fierte noeget al de rop:
‘Kom op, jim bea wie dochs om wyn?’

De float sylt noch mei sinneskyn
de haven út, it net leit klear
om op ‘e  fiskgrûn rap it wetter yn,
gjin tel oan tiid foar brea en Hear.

De see lûkt oan in donker kleed,
dat skomjend weaget, bol en hol,
de botters brûze binne foar’t de need
leart bidden, dêrom: ‘Tankewol’

* Peter J. Slerkenburg (1955-2000)
Skilderij ‘Silende skippen mei in stêd yn de fierte’
Skilderij ‘Float fan botters dy’t yn in haven farre’