februari 2, 2017
fan Fernand Khnopff*
Sjedêr myn suster Marguerite,
foar my mystearje as model,
sy joech har by it masker del,
dy twa sjoch ik as favoryt.
Refleksje hat sy op it each,
dat nei it bleke masker sjocht,
sy fielt him oan, wat hy al tocht,
dy beide driuwe op ien weach.
Hy seit itselde as har lea
fertelle oer wat komme sil,
de mûlen hâlde har deastil
en ha gjin sin oan ’t deistich brea.
Sjedêr it hieljend hospitaal,
de mûle iepen, sa’t it heart,
refleksje fan de mins dy’t stjert…
fertelde ’t masker dat ferhaal?
Myn leave suster Marguerite,
’t mystearje is no ienkear rûn,
in minske is it leafste sûn…
do rekkest hjoed dyn masker kwyt.
* Fernand Khnopff (1858-1921)
Tekeningen ‘Secret-Reflet’
januari 19, 2017
fan Marc Chagall*
Se wiene nei it doarp marsjearre,
soldaten mei in rûn symboal
en op it skouder ienenfjirtich,
se wiene út op drank en hoal,
foar har koe neat de nacht bedjerre.
Se wiene ier wer ôfmarsjearre
op ’t klopjen fan de holle kop,
noch op it skouder ienenfjirtich,
foar ’t migen holden se in stop
en koene de fioele hearre.
De snaren ha wol oeren klage
om ’t lyk dêr tusken seis kear ljocht
en fammen yn har eare oantaast,
de biezem hat de troep opsocht
en alles fan de strjitte fage.
* Marc Chagall (1887-1985)
Skilderij ‘Soldaten’
Skilderij ‘De deade’