juni 19, 2025
fan Francisco de Goya*
In lege stoel stiet achter har,
bestimd foar wa’t sy leaver sjocht
as har mei libbensûnderfining,
mar hjoed hat sy gjin kar.
It libben hat har noch net jûn
it ûnderskied dat nedich is
om har net daliks al te binen,
sy sjocht net yn it rûn.
Har eachopslach is nei him keard
dy’t sy yn har ferbylding sjocht,
mei beppe hat sy net dy bining
dy’t har oer ’t libben leart.
Do leave faam, ik jou ’t advys:
sjoch him mei iepen eagen oan,
dan wurkest oan in eigen miening
en wurdst úteinlik wiis.
* Francisco de Goya (1746-1828)
Yllustraasje ‘Goede rie’
Print 15 út ’e searje ‘Los Caprichos’
juni 5, 2025
fan Fernando Botero*
De kat moast ek op it portret
as bist mei skerpe klauwen
en famylje fan de rôvers,
frettend fan in oar syn fleis,
de kat is net fergees sa fet.
De foks is dea en boppe him,
waard yn sêft bûnt feroare
foar de presidintsfrou om te
aaien, lykas ek de kat,
lykas de foks is dy ek slim.
De presidint is slim en fet,
oars net as om te wurden
presidint, ek om te bliuwen
hiel syn koarte libben lang,
hy wit de tastân sels noch net.
Syn beide soannen ha ek macht
as generaal en hoeder
oer soldaten en oer leken,
minder slim, mar like fet,
slacht elk op heit syn slimmens acht.
It famke rint der ek net út
wat fettens oanbelanget,
beppe koe dy trend net keare,
likemin as foks en kat,
sy krijt as iennige in tút.
* Fernando Botero (1932-…)
Skilderij ‘De presidinsjele famylje’