april 3, 2025
fan Henri Ottevaere*
It kleed ferskilt mar
amper fan de hûd
en fan de feale snor,
dy’t net mear sprekt
fan ‘hjir bin ik’…
it is him sa wol goed.
De eagen sprekke
fan it hat goed west,
mar ’t is it no net mear,
der hat in brek
west… ‘hjir wie ik’…
wat bliuwt der oer as rest?
De rest sprekt him net
oan, it is al sein
wat hy eins sizze woe,
it is no krekt
as komt syn ik
meikoarten oan de ein.
* Henri Ottevaere (1870-1944)
Skilderij ‘De âlde man’
maart 6, 2025
fan Francisco de Goya*
Keale hollen, grutte bekken,
folle net genôch,
twa lege boarden
ûnder leppels dy’t healfol
nei iepen mûlen gean,
dy’t fiis opbrekke.
Twa dy’t folle mear ha wolle,
bargen dy’t de trôch
folslein leechmeitsje,
wylst de tredde laitsje moat
om hoe’t de mûlen stean
fan âlde bollen.
Grutte bekken dy’t lûd roppe,
folle net genôch,
om noch mear fretten,
want de mage is healfol
en raast om troch te gean
oant yn de kroppen.
* Francisco de Goya (1746-1828)
Yllustraasje ‘Skrokkich’
Print 13 út ’e searje ‘Los Caprichos’