december 10, 2022
fan ûnbekend*
Jeremia
Lykas in okse syn sylbeage
draacht, sa sil de grutske foarst
fan Edom, Moäb, Tyrus, Sidon
dy ek drage ûnder hearskippij
fan Babels grutte kening.
Dit moast ik bringe ûnder eagen
fan gesanten út it lân
fan Edom, Moäb, Tyrus, Sidon,
want dat boadskip brocht de Heare my,
dus tsjinje Babels kening.
De God fan Israel hat sprutsen
oer de skepping: út syn hân
kaam al wat op ’e ierde libbet,
alles sil Hy oan de kening jaan
dy’t hearsket yn grut-Babel.
It folk dat mei Gods wurden brutsen
hat, net harket nei de foarst
fan Babel, wurdt swier straft mei oarloch,
honger en de pest, ’t is út syn dwaan
en jout him oer oan Babel.
* Foto ‘Sylbeage’
december 7, 2022
fan James Tissot*
Jeremia
De prysters en profeten
rôpen lûd om Jeremia’s dea,
mar net de hege hearen
fan ’t paleis, sy harken earst
om dan dit lot te kearen.
De wurden dy’t earst klonken,
kamen rjocht út Jeremia’s hert:
‘Elk moat syn dwaan en litten
betterje, dan sil dit folk
wer nei syn namme hjitte.’
De âldsten lieten witte:
‘Micha en Oeria sprieken krekt
gelyk, dus hege hearen,
harkje net nei ’t lilke folk,
dat wol it lot net keare.’
De prysters en profeten
krigen fan de hearen net gelyk,
sy koene net mear stribje
nei de dea fan de profeet
fan God… lang sil er libje!
* James Tissot (1836-1902)
Skilderij ‘Jeremia’