Archive for the Bibelbylden category

De skepping wie noch net folslein
mei blommen yn de bloei
dy’t roeken by de beammen op
dy’t fruchten droegen yn de groei,
mar wêr wie eins de ein?

De dieren kamen midden-op,
de fûgels earst, kalkoen en pau,
dy stiek gjinien de eagen út,
de kleuresturt wie foar syn frou,
mar wêr wie eins de top?

De strús op hege poat, de hals
de wolken yn, seach ’t hear ris oer,
mar loek gjinien de poaten út,
it hynder, op ‘e frije toer,
dat dûnse al in wals.

De liuw, gjin kening noch fan ’t ryk,
sloep boartsjend oan de linkerkant
en sprong gjinien rûch achterop,
mar dat wie noch net alles, want
de minske joech replyk.

* Jan Breughel de Alde (1568-1625)
wie hôfskilder fan Albrecht fan Eastenryk
en freon fan Rubens.

Noch steane sy yn ’t neaken,
sa te sjen kin ’t bêst wol lije,
kreas yn ’t fel en lang fan hier,
de omkear is lykwols net fier,
dat skamteblêd is al in teken.

‘Ik sis dit wier net foar de grap,
’t is foar jim bêstwil, nim in hap.’

De eagen binne rjochte
op wat oars as op ’t ferbeane,
dat it kin wol út it sicht,
de frucht fielt foar syn fieding licht,
mar bringt de omkear wol it ljochte?

‘Jawis, ’t ferljochtet klear jim brein
en dêr is alles wol mei sein.’

De linkerhannen fiede
wat de rjochter eins net wolle,
mar gjin finger hâldt it tsjin,
foar beide jout it gjin gewin,
sy binne foar de takomst skieden.

* Albrecht Dürer (1471-1528)
Skilderij ‘Adam en Eva’