Archive for the Bibelbylden category

Kleurich wie de djoere mantel
dy’t er krige as bedoarne soan,
wat sette by syn broers kwea bloed,
dus taasten se syn heechmoed oan
en bûnen tou oan hân en foet,
ornearren him foar hannel.

detail

Keaplju mei in tal kamielen
kamen by de put en woene ha
gjin mantel, mar in bleate slaaf
foar net tefolle jild, no sa;
doe gie it fierder op in draaf,
gjin kâns mear om te dielen.

detail

* Konstantin Flavitzkij (1830-1866)
Skilderij ‘Joazef wurdt troch syn broers ferkocht’

Withoefolle fee gie him foarút,
fergoeding foar ’t slûchslim bedroch
om Ezaus berterjocht te stellen;
Jakob seach syn libben al as bút,
nea soed er al syn fee wer telle.

Froulju mei de bern deun achter him,
har stipe yn de rêch, ’t gesicht
nei foaren om syn broer te moetsjen,
wat er seach as djoere bruorreplicht…
stie Ezaus antlit op begroetsjen?

Folle net genôch fan Ezaus kant
mei earmen om syn twillingbroer,
in tút en dêrnei ryklik triennen;
’t âlde spoar gie yn it nije oer
en sa koe Jakob fierder rinne.

* Francesco Hayez (1791-1882)
Skilderij ‘Moeting fan Jakob en Ezau’