Archive for the Bibelbylden category

As rûge keardel fan it fjild,
de soan fan Izaäk,
waard Ezau jong al jager,
it wie syn hobby en syn fak,
faak kaam er by syn heit mei wyld.

Mar Jakob joech in hiel oar byld
as soantsje fan syn mem,
de ideale hoeder,
hy harke nei Rebekka’s stim
en nei de keppel yn it fjild.

Doe, mei de honger yn de hals
kaam Ezau sûnder wyld
werom by Jakobs tinte,
hat oars net as syn mage field,
gjin tinken oan wa’t spilet falsk.

Hy joech dy dei ’t earstberterjocht
oan Jakob samar wei
foar lekker reade earte;
yn spanning seach syn broer dernei,
goedkeap hat mem har soantsje ’t kocht.

* Lambert Jacobs (1598-1636)
Skilderij ‘Ezau ferkeapet syn earstberterjocht’

Hy kuerde, wat er fûn
kaam tichterby, in karavaan.

Har stap die de kamiel
om sa de rêst en doer te jaan,
mar fjurrich langstme waard har diel,
Rebekka, doe noch faam.

Sy kuerde, wa’t sy seach
kaam tichterby, in man fan stân.

It barde yn de jûn,
it stadich stappen yn it sân,
it wie ’t gefoel dat harren bûn,
se rûnen hân yn hân.

* Andrea Vaccaro (1600-1670)
Skilderij ‘Izaäk en Rebekka’