Archive for the Bibelbylden category

Babels kening Berodak-Baladan
hie in brief oan foarst Hizkia skreaun,
in lokwinsk foar syn betterskip;
it hie wat fan in goede freon,
mar ’t boadskip wie beladen.

In grutte delegaasje fan gesanten
kaam út Babel nei Jeruzalem,
wat foar Hizkia earfol wie;
hy liet har alle skatten sjen
as wiene it syn klanten.

Nei ’t bûtenlânske selskip kaam Jesaja
yn ’t paleis en sette út syn stim:
‘Neat bliuwt fan al dyn skatten oer,
foar Juda is de saak ferlern,
’t folk rint oan Babels leie.’

Juda’s kening bûgde doe de holle,
’t oardiel fan de Iene wie him goed,
want duorje soe syn eigen tiid
dy’t trochgie op deselde foet,
hy soe ’t net oars ha wolle.

* Reliëf mei Berodak-Baladan

Jesaja, dy’t profetetaal
spriek, sei: ‘Do wurdst net better,
oarderje dyn einferhaal.’

Hizkia bea om libbenstiid,
spriek fan syn goede dieden
foar de Iene yn de striid.

Jesaja kaam op ’t wurd werom:
‘Do silst net langer bliede,
sjoch, ’t foarútsicht is wer rom.’

Hizkia krige op ‘e swolm
in koeke mei flink figen,
mar de kening waard net kalm.

Jesaja makke ’t sicht doe rom
troch ’t teken dat er krige:
streek foar streek gie ’t skaad werom.

* Jacob de Backer (sirka 1555-sirka 1585)
Skilderij ‘Foarsizzing fan Hizkia’s genêzing’