Archive for the Bibelbylden category

Yn Elkos bin ik berne,
Nahum, treaster sa’t ik hjit,
bekend as ek ferflokker,
fan út it skaad nei skroeiend hjit,
profeten moatte beide kinne.

De Iene komt mei twirren,
smyt it stof de hichte yn
en lit de see ferdroegje;
de bergen skodzje fan de wyn,
syn grime wurdt al field fan fierren.

De Iene wol it goede
foar it folk yn grutte need,
befrijt fan jok en bannen
en makket Juda’s wei wer breed
nei Sion, wenplak sûnder noeden.

* Ikoan ‘Profeet Nahum’

Wat kin ik fierder sizze
as bidde mei in byld:
Wês hoeder fan jo folk
dat libbet yn it wâld yn ’t wyld
en lied it nei in fruchtber fjild
foar ’t weidzjen om dêrnei te lizzen.

De folken sille komme
om ’t weidzjen oan te sjen;
berôve fan har krêft
ha sy foargoed it pleit ferlern;
as slangen, kronkeljend oer ’t fjild,
ha sy oars net as stof ynnommen.

Wat kin ik oars noch sizze
as tankje mei in byld:
de weagen fan de see
ha alle kwea derûnder spield;
it folk tsjocht op nei ’t iepen fjild
dêr’t ieuwenâlde woartels lizze.

Ikoan ‘Profeet Micha’