Archive for the Bibelbylden category

Op twa dagen soene Joaden fiere
’t Poerimfeest, sa neamd nei Pûr, har lot,
de fijân op it lêst ta spot,
nei ’t swiere lot begûn it wiere.

Ester sette har dêrnei ta skriuwen,
harke skerp nei rie fan Mordekai,
foar ’t Pûrimfeest kaam earst geklei,
dy utersten soe elk op driuwe.

Soe it lot fan Joaden ea fergetten
wurde, dan klinkt inkeld noch geklei,
’t ûnthâld liedt ta de freugdedei,
dy’t altyd noch ferleit de swetten.

* Aert de Gelder (1645-1727)
Skilderij ‘Ester en Mordekai’

** Foto ‘Pûrimfeest’

Yn Joad Mordekai hie elk fidúsje,
want hy joech de kening wize rie:
it kwea dat yn syn ryk bestie,
waard mei de omslach in yllúzje.

Ester mocht wer by de kening komme,
dy’t har frege nei wat barre moast,
hy soe it tastean, op it koartst
wie grif de Joadehaat ferstomme.

Wat hie Haman thús de bern ferhelle?
Op syn soannen geat er oer de haat,
brocht harren op ’t ferkearde paad…
de winsk fan Ester wie tsien peallen.

Op ‘e dei dat Joaden stjerre moasten,
hawwe sy yn ’t ryk der sels mei ret,
de situaasje omkeard set,
dêrnei is ’t freugdefeest losbarsten.

* Marc Chagall (1887-1985)
Glês-yn-lead ‘Keunstwurk yn
it Hadassa (Ester)-sikehûs te Jeruzalem’