Archive for the Bibelbylden category

Wol útsjen nei de boade
dy’t gau komt om ree te meitsjen ’t paad
foar Him dy’t nei syn timpel giet
om rjocht te dwaan, elk nei syn aard.

Dy dei is as in lôgjend fjoer,
in oven foar de tsjoenders,
brekkers fan de goede trou,
de swarders dy’t dochs lige,
bazen foar de wurkers soer,
foar wa’t gjin rjocht docht oan de frou
allinne, oan de wees en frjemdling…
folk fan gjin ûntsach, in hiele rige.
Mar sjoch, in dei fan lange doer
brekt oan foar alle minsken
mei ûntsach foar God de Hear,
oer harren skynt de sinne,
better wurde siken, oer
is  ’t lijen, ’t libben nimt in kear,
sy sille har as keallen tjirgje…
folk fol fan ûntsach, sy sille winne.

Wol útsjen nei de boade
fan de Hear, dy’t makket ree it hert
fan âlden foar de bern en ek
oarsom, it is noch net te let.

* Yllustraasje ‘Profeet Maleächy’

Syn namme seit: hy wie Gods boade
yn in tiid fan twivelriedichheid,
hoewol’t de timpel wie in feit,
kaam sleurgong yn de moade.

It rûn net út op frjemde goaden,
mar it hillich fjoer gie stadich út,
dat Maleächy naam ’t beslút:
de fraach-en-antwurd koade.

De earste fraach wie: docht it bliken
dat de Hear fan Israel wol hâldt?
Gods leafde lit syn folk net kâld,
sil foar gjinien beswike.

De twadde fraach wie: respektearje
prysters by it offerjen de Hear?
Se meitsje rap in siik bist klear,
Hy kin dat net wurdearje.

Sa kaam de godsman mei syn fragen,
dêr’t in antwurd op kaam, kant en klear,
foar Israel in goede lear,
in rie yn twiveldagen.

* Byld ‘Profeet Maleächy’