Archive for the Bibelbylden category

It wie ynienen swart fan ’t folk
mei fakkels, Judit stie mei rjocht
te roppen: ‘Loovje, God de Heare!’
De kop fan Holofernes kaam foar ’t ljocht…
wa koe de freugde keare?

It folk bleau wekker yn de nacht,
de wurden galmen troch de stêd:
‘Oan God de ear, de Alderheechste
en oan de frou dy’t sloech him op syn bêd
en rêde út it dreechste!’

It wie noch yn de lette nacht
doe’t Judit oer in kriichsplan tocht
om ’t grutte leger bang te meitsjen:
in slimme skynoanfal by ’t earste ljocht
soe harren fijân reitsje.

* Skilderij ‘Judit mei de holle fan Holofernes’

Wylst Holofernes dêr sa lei,
foaroer en slop, de drank socht
yn de kop syn eigen wei,
gjin tinken oan in nachtferhaal,
socht Judit yn har geast nei ljocht
op ’t lêste fan de generaal:

O, Heare God,
Jo hawwe alle macht,
sjoch no yn goedens op my del,
hoe’t ik yn dizze nacht
jo erfskip feilich stel,
lit slagje dan myn plan,
o, Heare God fan Israel,
de dea oan dizze man.

Se naam it swurd en sloech twa kear
fûl op ‘e nekke, ’t bloed rûn
by it bêd del, sûnder ear
stoar sa de stoere generaal…
de striid waard troch ien frommes wûn,
it wie foar ’t lân in hiele haal.

* Caravaggio (1571-1610)
Skilderij ‘Judit en Holofernes’