november 4, 2017
fan Hendrick ter Brugghen*
Fansels is ’t in gelikenis,
mar lykje ik net op dy rike man,
ik dy’t dwaan kin wat myn hert begeart?
Mar wa’t ik by myn poarte mis,
is Lazarus… nee, misse is gjin sprake fan,
ik soe my skamje, hie ’k him keard.
Mar dochs, dy Jezus seach my oan
as wie ’k dy man en libbe ’k te rojaal
mei dy earme lijer foar de doar,
’t ferlyk mei my loek ik my oan,
mar is myn eigen libben wol sa ideaal?
Ik ha ek soargen… as in oar.
De soarch om net mear te bestean,
want stel dy foar, moarn is it mei my dien…
kaam dy rike man net yn it fjoer
mei al syn jild en kreaze klean?
Dan Lazarus, hy is nei Abraham ta gien…
foar my wurdt dat miskien in toer.
Jawis, as dat dan wier sa is,
dan mis ik foar de doar in Lazarus.
* Hendrick ter Brugghen (1588-1629)
Skilderij ‘De rike man en de earme Lazarus’
november 1, 2017
fan Rembrandt*
Twa broers yn in gelikenis,
dy’t Jezus hjoed oan ’t folk fertelde,
daliks ha ik oan Andréas tocht
as jongste, net dat hy in sûper is,
hy hat de frijheid ek net socht…
ik koe ’t ferlykjen dochs net litte.
As âldste bin ik aardich wis
en bleau ús heit ek trou mei ’t fiskjen
oant de dei dat Jezus by ús kaam,
gjin sprake fan dat it doe misgien is,
wy hiene beide noch gjin faam
en ha ús heit net sitte litten.
Andréas is de jongste soan
en hie al gau syn nocht fan ’t fiskjen,
dus dat Jezus rôp, kaam him wol út,
as Benjamin is hy troch heit bedoarn,
net dat hy út is op ’e bút,
mar dochs… ik moast as âldste switte.
Ik sjoch myn broer der net foar oan
dat hy foar heit falt op ’e knibbels,
lykas yn ’t ferhaal de jongste soan…
men kin fansels by einbeslút nea witte.
* Rembrandt (1606-1669)
Skilderij ‘Gelikenis fan de ferlerne soan’