maart 10, 2018
fan El Greco*
Myn earme dowen, ’t moat net gekker,
de fûgels wiene raar oerstjoer,
ynienen lei myn diske op ’e flier
en earlik wier, it wie my oer,
al dagen sit it my net lekker.
Ik sit al jierren yn de hannel,
de timpel is dêrfoar myn plak,
in do is foar de earmen ’t offerdier,
sa komme dy ek ûnderdak…
ik bin fan ûnbesprutsen wannel.
Hy kaam earjuster yn de timpel,
in fint mei yn de hân in tou,
in swalker dy’t it hiele lân troch gie,
hy brocht ús hannel yn it nau
en joech ús ek it rôversstimpel.
In rôvershoale, liet er witte,
dat makken wy fan ’t hûs fan God
yn plak fan dat der wiere stilte wie,
it wie my op dat stuit wol wat…
mar soe ’k myn hannel sjitte litte?
* El Greco (1541-1614)
Skilderij ‘Jezus ferjaget de keaplju út ’e timpel’
maart 3, 2018
fan ûnbekend*
Wy komme hielendal út Grikelân,
de reis ha wy der wol foar oer,
omdat wy Joaden binne
mei ’t each op ’t Peaskefeest,
foar altyd bliuwt dy hechte bân…
wa lit Jeruzalem dan rinne?
Doe’t wy dêr wiene, hearden wy ’t berjocht
oer ien dy’t wat te sizzen hie,
syn maat brocht ús derhinne;
swart fan minsken wie it dêr,
mar hy stie yn it folle ljocht,
lykas de timpel yn de sinne.
Ferhearliking, dat hearden wy it earst,
doe kaam in kerrel yn de grûn
om foar de frucht te stjerren;
oandien spriek er ús sa ta
as wie er oandreaun troch de geast,
syn wurden ha ús ynspirearre.
Doe klonk fan boppen: ’Sjoch myn hearlikheid!’
Guon seine, ’t wie in tongerklap,
mar ’t hat ús iepenbierre
dat syn stânpunt hiel wat seit.
Byldegroep ‘Griken freegje tagong ta Jezus’