Archive for the Bibelbylden category

Ald en nij foar Timoteüs

fan ûnbekend*

Yn Lystra kaam ik op ’e wrâld,
ús mem is in Joadinne
en ús heit fan Gryksk komôf,
dus kriich ik wat fan beide mei…
as kristen sil it folk my kenne.

Fan Paulus kriich ik ’t leauwe mei,
in pear jier lyn, hjirhinne
reizge hy mei Barnabas
mei ’t boadskip fan in nije dei,
foar my it rizen fan de sinne.

As kristen bin ik net besnien,
mar hjoed moast it al wurde,
sa woe Paulus dat leafst ha
fanwege Joaden, sy ha ’t dien
al iuwenlang nei Mozes’ wurden.

It is fansels net om ’e nocht,
ik rin net sûnder pine,
mar dêr stiet wol wat foaroer:
ik gean mei Paulus troch de wrâld
en lit it ljocht fan Kristus skine.

* Glês-yn-lead ‘Timoteüs’

Spul om Jehannes

troch Barnabas sjoen
fan ûnbekend*

Lit my mar iepen wêze,
earlik sizze hoe’t it rûn,
wy ha sûnt juster spul,
ik fiel my net oan Paulus bûn,
lit my troch him de wet net lêze.

Jehannes soe it sizze,
mar hy doarst úteinlik net:
hy woe wer mei op reis;
ik ha foar him de foarstap set
om op ’e nij de bân te lizzen.

De freonskip waard ferbrutsen
om’t Jehannes fuortgien is
en ús it wurk dwaan liet;
it wie foar Paulus doe al mis,
as troch de neven waard er stutsen.

Mar moatst it dêrby litte?
’t Is al wer it âlde liet:
do silst mar Saulus hjitte…

* Ikoan ‘Barnabas’

troch Paulus sjoen
fan ûnbekend*

Ik kin der koart oer wêze:
Barnabas sjocht soks ferkeard
en dêrom ha wy spul;
Jehannes hat de rêch takeard…
sy sille my de wet net lêze!

* Ikoan ‘Paulus’