april 1, 2020
fan ûnbekend*
Lit de fiifde kandler wêze
de gemeente fan stêd Sardes
en de fiifde stjer syn ingel,
dat folk sil dyn brief lêze:
Ik wit watsto tsjintwurdich dochst,
der wurdt sein datsto libbest,
wat net sa is, want do bist dea,
watst oan dyn dwaan en litten sjochst.
Wurd wekker, hâld it ljocht yn acht
en ek it krigen boadskip,
brek mei it libben datsto liedst,
want oars ferskyn ik ûnferwacht.
It kleed fan guon fan jim is skjin,
sy sille by my wêze
alhiel yn ’t wyt, want wa’t oerwint,
krijt troch myn tsjûgjen heger sin.
* Foto ‘Timpel fan Artemis te Sardes’
maart 28, 2020
fan ûnbekend*
Lit de fjirde kandler wêze
foar it folk fan Tyatira
en de fjirde stjer syn ingel,
sy moatte dyn brief lêze:
Ik ken dyn goede wurken,
ek dyn leafde foar de oar,
troch ’t leauwe bist helpfeardich,
dêr is ’t gemeentelibben foar.
Jim libje mei Izebel,
dy’t har eigen wegen giet
as falske profetesse
en dy’t as hoer har tsjinst oanbiedt.
Sy kriich de tiid foar omkear,
mar gie troch, no is sy siik,
har folk falt yn ellinde,
omdat it net mei ’t frommes briek.
Hâld fêst oan watsto krigen
hast, dan krijsto ek de macht
oer folken dysto liede
moatst as moarnsstjer nei de nacht.
* Foto ‘Ruines fan Tyatira’