oktober 26, 2023
fan ûnbekend*
Ezechiël
It riedsel, troch de Hear ferklearre,
oer twa fûgels as in earn sa grut,
ferhelle fan ’t massale stjerren.
De foarst fan Babel wie de earste earn,
hy hat de kening fan Jeruzalem
en al syn hege hearen meifierd
nei syn eigen lân, dat ta in wyngerd
waard: it folk is romte bean.
De foarst fan Babel sette op ’e troan
in ûnderkening yn Jeruzalem
om sa mei him oerien te kommen
dat ek Sion ta in rynske wyngerd
waard, mar falsk klonk dêr de toan.
Egyptes farao, de twadde earn,
dêr woe de ûnderkening wol op ta
om Babels kening te ûntrinnen,
mar gjin wyngerd kaam ta bloei yn Sion,
oantaast waard syn wif bestean.
In twiich wurdt plante troch de Heare
op ’e heechste berch yn Israel,
dy seder sil it needlot keare.
* Foto ‘Seder’
oktober 21, 2023
fan ûnbekend*
Ezechiël
In riedsel kriich ik fan de Heare
oer twa fûgels as in earn sa grut,
in riedsel om dêrfan te learen.
De earste earn mei brede wjukken,
wide wjukslach, ticht fan fear
en bûnt fan kleur kaam nei de Libanon
en loek it topke fan in seder ôf,
dat hy doe brocht nei ’t lân fan keaplju
en plante yn in hannelsstêd,
mar dêrnei makke hy in kear,
want mei in tûkje yn de snaffel
fleach hy nei syn eigen lân
en plante dat yn grûn dy’t fruchtber wie;
troch wetter groeide ’t tûkje al gau út
ta planten mei de woartels ûnder
en lange ranken nei de earn,
in hiele wyngerd kaam ta stân.
De twadde earn mei brede wjukken,
as de earste ticht fan fear,
seach hoe’t de wyngerd mei syn woartels op
him ôfkaam nettsjinsteande wiete grûn
dy’t soargje koe foar ripe fruchten,
mar mei in drûge eastewyn
ferskroeit de plant: de ommekear.
* Foto ‘Earnfûgel’