Wat wûnder waret troch de polder
as teiwaar it iis oer krûpt,
de snie fan reid en greide strûpt
en fûgels fleane om de mole?

Gjin wûnder dat de skiere loften
dize wiskje oer de kym,
de toer feroarje yn in skym
en keare fiere guozzekloften.

Oant op in dei de boer as mûnder
jout de wjukken oan de wyn,
ek wetter komt de gong wer yn,
de hiele polder draait foar wûnder.

* P.J.C. Gabriël (1828-1903)
wie ien fan de earste skilders
fan de Haachske Skoalle.
Hy neamde dit skilderij
‘Teilânskip’.