fan Joris van der Haagen*
 It lânskip is sa wiid as ’t leauwe
yn de hege loften boppe hiel it folk
fan protestanten oant de roomsken,
want de Ivige is harren tolk;
in brede stream fan tolerânsje
kronkelet nei de see fan Hollânsk heil,
de heuvels jouwe lykwols gjin garânsje
en se hysje elk it kleure seil.
Mar dochs wie ’t better as it suden,
hjit fan strideraasje, read de streamen bloed,
fan protestanten oant de joaden
flechten foar de fanatike floed
en Joris joech de tolerânsje
kleurich yn it wide lânskip wer,
de heuvels joegen lykwols gjin garânsje
dat it pontfear wie foar allegear.
Wa’t fierder fart it hege noarden
yn, komt út yn ’t flakke gea mei rjochte kym
fan diken dy’t it lân omklamje,
fan de greide oant de mar op rym;
wa lykwols jout it folk garânsje
as de Fryske Pier swaait mei it swurd,
syn earewraak fersûpt de tolerânsje
en de Ivige sylt swijend fuort.
* Joris van der Haagen (1615-1669)
syn foarâlden wiene út ‘e súdlike
Nederlannen flechte om it leauwe.
Joris is nei alle gedachten yn Arnhem
berne en yn 1640 nei De Haach ferfearn.
|
