De bok

admin

oktober 16, 2016

De bok

It taasten nei de prehistoarje
ropt de megabylden op
fan meunsters yn it prehumane gea
dy’t balten fjurrich har fiktoarje
lang troch hals en hege kop,
mar allegearre binne dea.

It libben yn it postmoderne
ropt de nije bylden op
fan meunsters yn it posthumane gea
dy’t har perfoarst wol rêde kinne
mei in stielen robotkop,
want alle minsken geane dea.

Wat bliuwt lykwols yn alle tiden,
is de driuw om te bestean,
as ’t kin yn ’t ljocht fan it ultime lok;
sjedêr, wat kin it bist ús biede:
libido sil nea fergean,
want heech op poaten stiet de bok.

Rikje Frjemde fûgels