Pestfûgels

fan Lucas Cranach*

Hat hy de pest oan dizze fûgels,
hong er dêrom harren op
as kleurich siersel oan de muorre?
Spiker op ’e kop!

Hy leaude fêst yn dizze fabel:
bringers fan de swarte dea,
de pest, fertsjinnen sels te stjerren…
dus fuort út ús gea!

Gjin sprake fan om noch te fretten
fan ús eigen reade bei,
jim komme oer de grinzen hinne,
nimme ûnheil mei.

Wy haatsje jimme tinkel-lûden,
dy’t net passe by ús styl,
jim fearren, surrogaat fan side,
binne te subtyl.

Wy ha de pest oan frjemde fûgels,
fretters út it fiere gea,
mar kinne wy oan jim fertsjinje…
spiker yn de lea!

* Lucas Cranach (sirka 1472-1553)
Skilderij ‘Twa deade pestfûgels’