september 24, 2022
fan ûnbekend*
Jeremia
Wat kin ik as profeet noch dwaan
no’t om my hinne ’t ûnheil beart,
myn wurd it folk net rekket?
Ik bûch de holle om te bidden,
de Heare alle lof te jaan.
Jo hearlikheid riist nei de troan,
dy’t stiet by ús yn ’t hillichdom,
dêr’t Israel ferwachte
it heil, mar ’t folk hat Jo ferlitten
en lûkt it kleed fan skande oan.
Ik fiel my mei dit folk ferbûn,
joech troch it wurd dat klinke moast:
‘Rêd my en ik bin rêden,
Jo binne troch de tiid de welle,
dat wetter makket my wer sûn.’
Sy kearden harren fan my ôf,
mar ha ik oanstien op in ramp,
it folk brocht yn ellinde?
Jo wurden kamen oer myn lippen,
dus Heare, bring my net yn ’t nau.
Foto ‘Welle’
september 23, 2022
fan ûnbekend*
Ha jonges yn Nenetsië
yn ’t kâlde gea fan Ruslân
ek de oprop krigen om
te fjochtsjen foar de naasje?
Sy binne ’t izich libben wend
en altyd yn beweging,
kom op: mobilisaasje!
Har taiga is ûnbidich grut
mei net te tellen dieren,
rinnend oer de hurde grûn,
ferneamd yn hiel de naasje,
noch fierder, yn de wrâld bekend
en altyd yn beweging,
dus ek: mobilisaasje!
Mar nee, Nenetsië hat gas,
dat streamt nei alle lannen
foar in roebel-stream werom
ta rêding fan de naasje
troch Poetin as in prima fint:
de jonges en de dieren,
sy krije fan him graasje.
* Foto ‘Toendra yn Jamalo-Nenetsië yn Ruslân’