maart 25, 2025
fan ûnbekend*
Wêr binne de profeten bleaun
dy’t earder skerp fan mûle
sloegen mei ’t rjochtfeardich wurd
tirannen om de earen,
sadat sy fan har fuotstik foelen.
Sprekt in profeet yn Israel
de moardners nei de mûle,
dan ferdraait er ’t rjochte wurd
dat sprekt fan genoside…
hear, Israel, de berntsjes gûlen.
Do razer yn Amearika
slachst ticht de iepen mûle
fan wa’t sprekt it wiere wurd,
fertroust op nep-profeten,
dy’t foar dy op ’e knibbels foelen.
Do rudich Russysk patriarch
praatst mei in fluenske mûle
sels de satan nei de bek,
as nep-profeet bist moardner
om’t withoefolle deaden foelen.
Wêr binne de profeten bleaun
dy’t, oars as diplomaten,
sprekke op tsjin de tiran,
al kostet har it libben,
oer hinne-wer falt net te praten.
* Yllustraasje ‘Profeet’
maart 23, 2025
fan ûnbekend*
Wa ûnderfynt net in barriêre
ûnderweis yn it bestean?
Mei gong kin men der dan oerhinne,
wat in goed ferhaal opsmyt
en ek it klappen fan ’t publyk.
Chuck Yeager woe it klappen hearre,
as piloat gie hy derfoar:
as earste troch de lûdsbarriêre,
wat him lûd applaus opsmiet
en boppedat in filmferhaal.
Elk minske wol leafst nei it stjerren
syn ferhaal oer it bestean
ferteld ha om bestean te bliuwen
yn de neitins fan de bern
en bernsbern, ’t klappen is dan oer.
* Foto ‘Charles Elwood (Chuck) Yeager’