oktober 1, 2025
Sjedêr wat oerbliuwt nei de stoarm
dy’t oer it weagjend wetter raasde:
skom te licht om lang te bliuwen.
De wrâld oer klonk in skril alarm
fanwege machten dy’t rûch raasden,
ûnder lammen wreed as liuwen.
De stoarm sloech weagen op ’t basalt
yn stikken, machtich hoe’t se skommen:
Fredesdowen? Skrille miuwen!
De stilte falt nei al ’t gebalt,
it skom ferwaait, de macht ferstommet,
tiid om fredeswyn te priuwen.
september 28, 2025
fan ûnbekend*
Der is altyd in winner
by it draven fan de maraton,
al komt men deawurch oer de finish,
men slacht foar master op
en fielt jin as Napoleon.
Faak hat de Frânske keizer
mei syn leger maratons ôflein,
hy gie altyd foar de oerwinning,
in master oan de top,
mar oan de ein waard hy ferslein.
Fan rinnend leger nei de
tank, om fier te sjitten it kanon,
tanimmend kâns op de oerwinning,
in wapenwedrin nei
de top, oars as in maraton.
Fan tolve lannen yn de
Navo nei de proef mei it atoom
fan Ruslân, ’t waard in wapenwedrin
dy’t brocht ek oarloch mei…
sa jeie se elkoar op stoom.
* Foto ‘Wapenwedrin’