fan Francisco José Goya y Lucientes*
Wat hat de oarloch tsjin Napoleon
oan wrede rampen Spanje brocht?
’t Untbriek oan fjoer fan it kanon,
it wie de bleate hân dy’t focht.
De nekke knapt, de earmen slop,
it hinget oan in koppe beam,
hy hinget mei foarút it krop
nei ’t hysjen, ien foar ien, yn stream.
Ferburgen ûnder ’t skuorde kleed
hat sy by kleden lâns lang socht,
by elke stap noch grutter leed,
it paad is lang, mar lang net rjocht.
De skouders bleat, yn wite jurk
bliuwt inkeld Augustina oer,
op liken docht sy no har wurk,
yn bleate hân ’t kanonnefjoer.
De hannen bûn mei noch it krús
bliuwt hy om Kristus’ wil de tolk
fan alle lijers sûnder thús,
de stappen fan ’t fersleine folk.
* Francisco José Goya y Lucientes (1742-1828)
wie 62 jier doe’t de oarloch tsjin Napoleon útbriek.
Hy makke dêr in searje fan tachtich etsen fan. |
