oktober 21, 2022
fan ûnbekend*
In foks ferliest syn hier,
mar wint nei elke streek
en krijt sa ûnderfining
hoe’t er slim him rêde moat,
it is in skrander dier.
Syn kop is yn ’t hielal
te sjen, sels foar in leek,
en hinget yn de dize
fan miljarden stjerren, net
te tellen is dit tal.
De wolk fan stjerren, gas
en stof hat mei de foks
te krijen, ’t is de namme
dy’t er oan de dize jout,
syn hier komt sa te pas.
Hoefolle hierren hat
de foks de tiid troch al
ferlern, dy binne net te
tellen… stjerren likemin…
de namme hat wol wat.
* Foto ‘Foksehierdize’
oktober 14, 2022
fan ûnbekend*
It doarp moast wike foar it reservoir,
dat oanlein waard foar heger doelen
as foar Derwent op te kommen,
wenjen wie de lêste kar.
It reservoir moast duorsum stroomkrêft jaan,
wat útgie boppe ’t folk fan Derwent,
dat it doarp foargoed ûntnommen
waard, it koe der neat oan dwaan.
Mar riisde ’t wetter nei it heechste peil,
dan wie der altyd noch de rûnte
om oan ûnheil te ûntkommen,
want de wetterfal wie steil.
By drûchte sakke ’t wetter nei in stân
dat Derwent as ruïne boppe
kaam; dy sykhelle ferromme,
mar it bleau ferdronken lân.
* Foto ‘Ladybower reservoir rint oer’