januari 20, 2023
fan ûnbekend*
It skaaimerk fan in hichte is
dat dy foar fariaasje soarget
yn it lânskip, grûn of see,
sadat de kym ferbrutsen wurdt…
ferbylding seit: ‘Der is neat mis.’
De rotsformaasje yn de see
ropt op it byld fan troch de iuwen
hinne hâldt oertsjûging stân,
is ’t net it leauwe dan it wurd,
foar marteling of dea sels ree.
De Costa Brava hjoed de dei
lit sjen in bûnte fariaasje
fan ferdivedaasje, grûn
of see, it jout net wat it wurdt…
de werklikheid wol: ‘Doch do mei!’
Sjedêr op grûn fan ’t leauwe stean
by Costa Brava noch de tsjerken,
lykjend op in rots yn see,
al jierren is dy romte leech…
de werklikheid lûkt hichten skean.
* Foto ‘Rotsformaasje by Costa Brava’
januari 13, 2023
fan ûnbekend*
Syn stânplak wie fier yn it suden,
mar it wie deselde oseaan
dy’t him it wide útsicht joech,
mar Lima fûn, hy stie te iensum,
soe de toer in oar plak jaan.
De toer ferfoer doe nei it noarden,
kriich in stânplak op ’e griene kust,
seach twa kear op ’e brâning út:
dy fan de stêd en fan de weagen,
foar it fjurrich each in lust.
Hy smyt syn fjoer nei fjouwer kanten,
krijt fan trije net in groet werom,
mar út it easten weaget oan
de groetenis fan ljocht en leven…
iensumens gie oer yn rom.
Foto ‘La Marina-fjoertoer by Lima’