november 8, 2020
fan ûnbekend*
fan ûnbekend**
Tiid en romte as in twaspan,
sa seach Einstein dy relaasje:
relativiteit yn it hielal,
de wittenskip kriich faasje.
Mei ’t kompas hat Albert boarte,
’t waard foar him in rjochtingwizer
nei it noarden en de wittenskip,
troch ’t witten waard er wizer.
Syn fioele liet er klinke
om yn harmony te kommen
mei syn tinzen oer in grut ferbân,
sa waard syn geast ferromme.
Iepen stie er foar ’t mystearje
yn relaasje mei it witten,
’t waard foar him in wei nei God Natoer…
wa koe him mear ûnthjitte?
Mei de wittenskip as basis,
libjend in de heechste sfearen
fan de kosmos, kriich er de Nobel-
priis, yn relaasje eare.
* Foto ‘Albert Einstein as jonkje’
** Foto ‘Albert Einstein as âldere man’
november 1, 2020
fan ûnbekend*
fan ûnbekend**
Duce supremo woesto hjitte,
mar do hietst Victor Emanuel,
de tredde mei dy namme,
kening fan in machtich ryk,
do hast dy foar Il Duce net skamme.
Mussolini, as Benito
kaamsto op ’e wrâld, do wiest yn tel
as jonkje, koest dy rêde,
wiest oan keningen gelyk:
Il Duce, dy’t rûn mei foarse trêden.
Duce supremo, koest net keare
wat Il Duce brocht? ’t Kaam op oarloch del:
safolle deaden, nammen
sûnder macht yn ’t grutte ryk,
do droechst dyn titel ûnbeskamme.
* Foto ‘Victor Emanuel III’
** Foto ‘Mussolini’
