maart 14, 2021
fan ûnbekend*
Sels liket hy ynferzen,
Clarence Birdseye yn de kjeld
fan ’t hege noarden, Labrador
hat him in kâld geheim ferteld.
Hy soe de earste wêze
dy’t de wrâld in friezer joech,
’t idee kaam út it noarden wei,
dêr’t hy troch iis syn kânsen woech.
De froarst liet Clarence witte:
fluch beferzen fisk hat sin,
ûntteid en bakt, it smakket goed,
de konsumint bringt grif gewin.
Birds eye seach him wol sitten…
stean: de friezer tsjin bedjer
en foar de smaak, de hannel wie
dernei, ’t produkt kriich mannich stjer.
* Foto ‘Clarence Birdseye’
maart 7, 2021
fan Salvador Dalí*
It kaam fan boppen,
út ’e hichte wei
en briek ynienen troch,
lykas de sinne troch it aai,
de djerre tusken doppen.
Surrealisme wiist de wei;
wat reëel wie, it geweld
mei withoefolle deaden,
koe net mear foar wier trochgean;
’t is de wierheid dy’t fertelt
dat dreamen geane boppe
breinwurk út en sweve as in earn
fan ’t iene plak nei ’t oare,
sûnder wjukslach, op termyk
fan wat er yn it aai al learde,
dat op tiid trochmidden briek,
sadat in earn kaam yn it ryk
fan boppe-ierdske fantasy
om ’t minskdom te bekoaren
mei wat fan reëel ôfwiek.
It komt fan boppen,
út ’e hichte wei
en libbet noch altyd
foar wa’t it aai nimt dreamen mei,
hy heart de fûgel roppen.
* Salvador Dalí (1904-1989)
Skilderij ‘De sinne’