november 22, 2020
fan ûnbekend*
fan ûnbekend**
De heuvel wie om djip te graven,
want dêrûnder lei it âlde Ur,
dat Woolley boppe helje woe
om oer it libben mear te witten:
it bestean fan foarst en boer.
Hy djippe op de keningsgrêven
fan de dynastyen yn de tiid
doe’t Ingelân noch net bestie,
de measte grêven wiene stikken…
misdied dy’t der letter wie.
It grêf fan keningin Puabi
kaam mei al syn rykdom foar it ljocht:
goud, juwielen en ek noch
har trijentweintich tsjinneressen,
wat de tiid fan Ur meibrocht.
De harpe hat yn Ur ek klonken,
Woolley fûn dy mei in bollekop
fan goud, fersierd mei suver blau;
syn djipgeand graafwurk koe net stikken:
Urs ferline nei de top!
* Foto ‘Leonard Woolley mei in byldsje’
** Foto ‘Leonard Woolley mei de harpe’
november 15, 2020
fan ûnbekend*
fan ûnbekend**
In Ier mei hert foar ’t heitelân,
dat Ingelân net fele koe,
de frijheid wie it stribjen
fan Michael Collins, dy’t ha woe
de Ier soe foar de takomst libje.
It stribjen koe net sûnder striid,
in strider waard er yn ’t ferset
tsjin Ingelân, ’t mislearre
mei Peaske, opstean koed er net,
de Ier lei plat as soed er stjerre.
It kaam al gau ta in bestân
mei Ingelân: in Ierske steat
mar sûnder Ulster like
de Ieren op ’e kop ferkeard,
de fijân lykwols woe net wike.
In boargerstriid wie it gefolch:
de iene tsjin de oare Ier,
wat Collins ’t libben koste,
de takomst like withoefier…
wa koe doe Ierlân noch ferlosse?
* Foto ‘Michael Collins’
** Búste ‘Michael Collins’
