december 6, 2020
fan ûnbekend*
Wêr wie in arsjitekt te finen
dy’t sa bouwe koe dat nei in skok
’t gebou net falt, mar inkeld swaait?
Net yn Japan, mar oer de oseaan:
boumaster Frank Lloyd Wright.
Hy liet syn ljocht oer ’t weagjen skine
fan de ierde, foar Japan in flok,
om’t mannich bouwurk samar leit
as fûle skokken tsjin de muorren slaan,
dus freegje Frank Lloyd Wright.
It antwurd wie: ‘Betonnen peallen
moatte romte krije yn de grûn,
’t gebou swaait dan as wie it reid.’
Sa kaam ’t Imperial Hotel ta stân
fan tinker Frank Lloyd Wright.
Syn tinken koed er goed fertelle,
kaam yn byld as geve plattegrûn;
’t gebou ferriisde, wie ’t bewiis
dat fûle skokken ha gjin ynfloed hân…
sa wie syn tinken wiis.
* Foto ‘Imperial Hotel te Tokyo’
november 29, 2020
fan ûnbekend*
Soldaten, misjonarissen**,
far nei Senegal, in Frânsk gebiet
yn Afrika, wês striidber foar de Hear,
dy’t takomst oan de folken biedt,
jim kinne it wol risse.
Afrique sil jim dêrhinne farre,
mei dy namme is de koers al jûn,
jou jim mar del, ’t komt mei de Geast wol klear,
dy makket swarte sielen sûn,
har is de hel besparre.
De Geast sil jim derhinne waaie,
útsein as de wyn wurdt ta in stoarm,
elk docht dan op Afrique de hannen gear,
de kapitein jout noch alarm,
mar ’t needlot kin net draaie.
Soldaten, misjonarissen,
jim bestimming wie in Frânsk gebiet
yn Afrika, mar stride foar de Hear?
Jim kamen net mear ta dy died…
it kin de bêste misse.
* Foto ‘Stoomskip Afrique’
** Kongregaasje fan de Hillige Geast