maart 7, 2021
fan Salvador Dalí*
It kaam fan boppen,
út ’e hichte wei
en briek ynienen troch,
lykas de sinne troch it aai,
de djerre tusken doppen.
Surrealisme wiist de wei;
wat reëel wie, it geweld
mei withoefolle deaden,
koe net mear foar wier trochgean;
’t is de wierheid dy’t fertelt
dat dreamen geane boppe
breinwurk út en sweve as in earn
fan ’t iene plak nei ’t oare,
sûnder wjukslach, op termyk
fan wat er yn it aai al learde,
dat op tiid trochmidden briek,
sadat in earn kaam yn it ryk
fan boppe-ierdske fantasy
om ’t minskdom te bekoaren
mei wat fan reëel ôfwiek.
It komt fan boppen,
út ’e hichte wei
en libbet noch altyd
foar wa’t it aai nimt dreamen mei,
hy heart de fûgel roppen.
* Salvador Dalí (1904-1989)
Skilderij ‘De sinne’
februari 28, 2021
fan ûnbekend*
In grut man mei it eachweid
op ’e leafde, strang ferbean
by wet en troch ús Leave Hear;
hy wie de jierren fier foarút:
sy kamen oan de ein ek klear.
De leafde net beheine
ta it houlik, man en frou
by wet en troch de Hear ferbûn;
hy wie foar elke leafdestút
en fierder… dat wie wat hy fûn.
Rjochts-ekstremisten holden
net fan wat er wie en sei,
sy holden har net oan de wet
en spilen foar de strange Hear,
fan homo’s hie dy gjin ferlet.
It eachtweid fan de nazi’s
wie beheind ta eigen ras
en leafde foar it heakkekrús,
sy wiene mei ’t ferskaat gau klear:
de ballingskip of ’t kamp as thús.
* Foto ‘Magnus Hirschfeld’