juni 13, 2021
fan ûnbekend*
fan ûnbekend**
De namme klinkt lykas muzyk,
dêr’t men mei nocht op dûnsje kin:
Rudolf Valentino
fantasearre al as bern,
hy woe op skoalle net omlyk.
Hy reizge nei Amearika,
it lân fan stadichoan omheech:
boardewasker, túnman,
dûnser, ’t like as er fleach
as fûgel nei it heechste ta.
It folk rûn mei de filmstjer wei,
al joech er op it doek gjin lûd,
Rudolf Valentino’s
byld spriek oan en jage ’t bloed
op, wat oer him it measte sei.
Net alles is dêrmei al sein,
want bûtensletten wie de dea:
Rudolf Valentino
hie in krupsje yn de lea,
al jong kaam hy sa oan syn ein.
* Foto ‘Rudolf Valentino’
** Foto ‘Rudolf Valentino as filmstjer’
juni 6, 2021
fan ûnbekend*
fan Walter Gropius**
Gjin sprake noch fan âlde tiden,
inkeld foarmen foar de sier,
it gie net mear fan heit op soan,
de romantyk wie bombardearre,
dat de kroan foel fan de troan.
Lit Walter Gropius mar bouwe
foar in nije wrâld yn ’t spier
mei strakke foarmen, oeral ljocht,
de keunst waard sûnder mear wurdearre,
dat it folk kaam ta syn rjocht.
It Bauhaus soarge foar de romte,
luchtich, sinnich, sûnder sier,
sadat it libben ljochter waard
en licht om maklik op te fearjen:
optimisme nei syn aard.
* Foto ‘Walter Gropius’
** Walter Gropius (1883-1969)
It Bauhaus yn Dessau
