augustus 1, 2021
fan ûnbekend*
In plan wiist nei de takomst ta
om troch te wurkjen nei in ideaal:
safolle yn in koarte tiid,
it giet op ’t lêst om kwantiteit,
it grutte kapitaal.
It kaam fan Stalin, hy woe ha
dat lytse boeren yn it grut
mear leveren yn koarte tiid,
it gie net mear fan heit op soan,
de wet hie ’t lêste wurd.
It moast net lykas ’t wie, mar sa:
de lytse boer yn it fabryk,
gjin útsicht mear op wiid en siid,
it kaam sa op produksje oan,
oan ’t ideaal gelyk.
Gjin minske is der mar op ta,
elk libbet mei syn eigen lyts ferhaal,
dat hy fertelt, elk op syn tiid,
it giet op ’t lêst om kwaliteit,
in heger ideaal.
* Foto ‘Mei Stalin’
juli 25, 2021
fan ûnbekend*
fan ûnbekend**
In dûbellibben hjir en dêr,
tichtby de grûn en yn de flecht,
yn frijheid en totalitêr,
it moast foar Charles wol kinne.
De oseaan hold him net tsjin,
sa kaam er fleanend nei Parys,
it wie de Steaten nei it sin,
mei him as held wie rom te winnen.
Hy waard de loftfeartpionier,
ferbettere de fleantechnyk,
de naasje makke gjin beswier
en liet syn hichtemotor rinne.
De Steaten wiene op ien ein
doe’t lytse Charles fermoarde waard,
dêroer is ’t lêste wurd net sein,
soe heit de dieder wêze kinne?
It rûn ferkeard yn Dútslân ôf
doe’t hy dêr dekorearre waard,
’t rasisme brocht him yn it nau,
de naasje liet de held allinne.
In dûbellibben hjir en dêr,
mear froulju joegen him ek bern,
foar har wie hy de loftfeartstjer…
totale frijheid moast dochs kinne?
* Foto ‘Charles Lindbergh’
** Foto ‘Spirit of St. Louis’
