december 5, 2021
fan ûnbekend*
Gjin see kin ’t leger keare
as it stribjen is de macht
oer lange grinzen hinne,
langer as it eigen lân…
de macht is oan de hearen.
Soldaten moatte sjitte
op kommando fan de macht
dy’t út is op it winnen
fan gebiet yn fijâns lân…
de hearen kinne ’t witte.
Japanske hearen jouwe
inkeld op Sinezen acht
as sy har skikke wolle
nei it fjoer fan ’t bruorrelân…
de broers dy’t skeine frouwen.
Gjin sekken kinne keare
’t stribjen nei de heechste macht
dat spûket yn de hollen
fan hearen yn it heitelân…
sy wurde dekorearre.
* Foto ‘Sinezen achter de barrikade
yn de Japansk-Sineeske oarloch’
november 28, 2021
fan ûnbekend*
As in hammer slacht it yn de kop
nei tolve glêzen skomjend bier
en nei in nacht yn koma…
skerpe spikers ûnder ’t hier.
Wat ferslacht de kater yn de kop?
Gjin tange kriich hâldfêst
op spikers sûnder kop, dat
sûpers holden oeren lêst.
Yn it lân fan dream en djippe winsk
waard nei in middel socht
dat brûsde yn de mage,
spikers boppe wetter brocht.
Alka Seltzer brûsde troch de lea,
kniep spikers út ’e kop
en liet de dei wer komme
nei de nacht… it bier wie op.
* Yllustraasje ‘Alka Seltzer’