maart 5, 2023
fan ûnbekend*
It lân dat iuwen hearske oer
de weagen, ek de heale wrâld
syn wil op lei, hold net mear stân:
koloanjes waarden nije steaten,
oerbleau inkeld Ingelân.
Twa folken yn in smel gebiet
mei rjochten, nij of al hiel âld,
mei mieningen, folslein ferdield,
fan Israel en Palestina,
wat as ûnrjochtfeardich fielt.
Tal naasjes yn in hecht ferbân
besleaten ta ferdieling: elk
in part, sadat it rjocht it wint
foar Israel en Palestina…
ha de naasjes har fersind?
It folk dat tsjinnet noch Jahweh,
wit neat mear fan de Sinaï,
de berch fan Mozes en de wet:
‘Do silst net stelle en net moardzje!’
Bloed ferjitte wurket net.
* Foto ‘Palestina en Israel’
februari 26, 2023
fan ûnbekend*
fan ûnbekend**
Hy moast de allergrutste wurde,
want Hindenburg wie fjildmaarskalk
en letter ek noch presidint,
foar Hitler koe it ek net lytser:
in reus foar hiel it nazi-folk.
Foar ’t loftskip wiene amper wurden:
’t foer as ‘Titanic of the sky’
fan Dútslân nei Amearika
en ek nei Rio de Janeiro,
it makke mannich lange reis.
It wetterstof joech ’t skip de draachkrêft
foar tsjin de hûndert lju oan board,
dy’t sweefden yn in loftpaleis,
dat transformearre ta in fakkel…
foar Hitler hat de reus net scored.
Hy waard troch ’t fjoer de allerlytste,
der bleau allinnich jiske oer
fan de ‘Titanic of the sky’
en ek fan fiifentritich minsken…
de twadde fal fan Babels toer.
* Foto ‘Hâlden en kearen mei de Hindenburg’
** Foto ‘De ûndergong fan de Hindenburg’
