maart 19, 2023
fan ûnbekend*
De sinne lit neat nijs mear sjen,
want wat de iuwen troch sa west hat,
wurdt trochlutsen nei it no:
de berte fan in bern, de dea fan minsken
yn de bloei, de wierheid, soms in show.
Nim Stalin, fan de macht in fan
oant hy dy gripe koe, troch alles
hinne waard it werklikheid,
gjin minske koe syn solo-stribjen keare,
foar de show wie hy de sterke heit.
De heit dy’t hearske oer syn bern,
in macht dy’t troch de jierren hinne
net ferneare koe dat wa
dan ek de sinne yn syn wetter skinen
seach, sa’n minske moast de deastraf ha.
Mar net planút, want in proses
joech oan, it hie net om ’e nocht west,
want de rjochter spriek it ho
út foar de minske mei tefolle winsken…
solo-macht feroare yn in show.
* Yllustraasje ‘Heity Stalin’
maart 12, 2023
fan ûnbekend*
As dochter fan in toskedokter
liet sy har gebit faak sjen,
omdat it libben har talake
mei de eigen takomstbylden,
fan de kreaste manlju wie sy fan.
Mei sechtjin jier op eigen skonken,
dy’t der wêze mochten as
de tosken dy’t fan wille blonken,
krekt geskikt foar eigen bylden
op it wite doek, dêr gie sy los.
In ingel middenmank Hell’s Angels,
sa liet sy har himelsk sjen
as filmstjer, wis fan eigen sjarme,
sekssymboal yn oare bylden,
manlju rekken troch har spul ferlern.
Yn seis jier bûn sy trije manlju
oan har wûnderlike lea,
belibbe sa reëel de leafde,
mar har lichem brocht ek bylden
mei dy’t sprieken fan har iere dea.
* Foto ‘Jean Harlow’