februari 12, 2023
fan ûnbekend*
fan Pablo Picasso**
Hoe woe de Dútske macht it ha
dy’t troch de loft mei faasje fleach
as oefening foar ’t kriichsgeweld
dat grif mei hasten komme soe,
mar earst nei Guernica!
Want Franco gie op ’t heechste ta:
ultime macht oer hiel it lân,
sadat gjin minskelibben telt,
mar inkeld wat mei faasje fljocht
op wei nei Guernica.
De bommen woene romte ha
foar Franco’s stribjen nei de macht
al waard in stêd dan ek ta hel,
wat fuortkaam út in oefening
op ’t proefplak Guernica.
Picasso woe op ’t djipste ta
mei ’t byld dat foar ’t ûntfanklik each
it lijen opropt fan wa’t telt:
de minske swalkjend sûnder skuld
troch ’t platte Guernica.
* Foto ‘Bombardearre Guernica’
** Pablo Picasso (1881-1973)
Skilderij ‘Guernica’
februari 5, 2023
fan ûnbekend*
fan ûnbekend**
Gefoelens koe hy net ferbergje,
kamen der keunstsinnich út
op withoefolle mêden,
ek as leafde foar ’t geslacht
dêr’t hy in ûnderdiel fan wie,
úteinlik fielde hy de macht.
Hy dichte, skreau en musisearre,
brocht op doek de wrâld yn byld,
koe sjonge en aktearje,
mar syn leafde kriich gjin acht
fan wa’t er op mear mêden hold,
úteinlik fielde hy de macht…
… fan wa’t yn Spanje rûch regearre,
mei geweld it folk ferdield
hat; ’t dichtsjen waard ferfongen
troch it moardzjen dei en nacht
oant Frederico troffen waard…
’t gefoel waard sa de proai fan jacht.
* Foto ‘Frederico Garcia Lorca’
** Foto ‘Frederico Garcia Lorca’
