augustus 16, 2020
fan ûnbekend*
Lit ús op it libben drinke,
lit ús drinke op ’e dea,
der is neat tsjin op fleurich wurde,
freugde docht gjin minske kwea,
elk wurdt betsjinne op syn winken.
Lit ús tinke oan it libben,
ek in bytsje oan de dea,
dy’t wol wat hat mei dronken wurde,
alkohol lûkt troch de lea,
fersloppet wêr’t men earst nei stribbe.
Lit ús leare fan de Steaten,
dy’t feriene wiene tsjin
de alkohol om drûch te wurden,
mei it each op grut gewin,
mar wit dat drinkers fierder geaten.
Lit ús net nei oaren wize:
drinkers of wa’t bliuwe drûch,
want elk wurdt op syn wize wizer
yn de keamer of de kroech…
lit alle geasten fleurich rize.
* Foto ‘Alkohol wurdt ferballe’
augustus 9, 2020
fan ûnbekend*
fan ûnbekend**
Afghanistan, lân tusken bergen,
heech hiesto it yn de kop,
woest eigen wetten folgje,
ek as ’t gie oer ’t bûtenlân,
mar mis, de Britten spilen heger op.
It wie foar emir Habibullah
net genôch foar ’t eigen lân
om ’t Britske ryk te folgjen
yn it bûtenlân, hy brocht
it yn petear, mar fierder neat ta stân.
Afghanistan, lân fan de wapens,
leech leisto de fijân del,
mar ek dyn eigen emir
yn it binnenlân, de moard
liet sjen dat wurden wiene net yn tel.
Syn soan waard emir, Amanullah
gie de striid oan mei de Brit
om eigen baas te wurden
oer ’t beleid foar ’t bûtenlân,
wat slagge nei in fearnsjier bloed en swit.
* Foto ‘Habibullah’
** Foto ‘Amanullah’
